Әзербайжанның мәдени астанасы – Шуша қаласында Әзербайжан, Қазақстан, Түркия және Өзбекстанның Ұлттық кәсіподақ орталықтары жаңа бірегей біріккен құрылым Түркі елдерінің кәсіптік одақ ұйымын құру туралы келісімге қол қойылды, деп хабарлайды Еl.kz ақпарат агенттігі.
Келісімге Әзербайжан Кәсіподақтар конфедерациясының төрағасы Саттар Мохбалиев, Қазақстан Республикасы Кәсіподақтар федерациясының төрағасы Сатыбалды Дәулеталин, «Türk-İş» Түрік кәсіподақтары конфедерациясының президенті Ергюн Аталай, Өзбекстан Кәсіподақтар федерациясы төрағасының орынбасары Бахтиер Махмадалиев қол қойды.
Қырғызстан Ұйымға бақылаушы мәртебесінде қатысады. Жаңа құрылымның негізгі мақсаты – еңбеккерлердің әлеуметтік, еңбек, кәсіптік, экономикалық құқықтары мен мүдделерін қорғау жөніндегі іс-шараларды біріктіру. Келісімге қол қойған елдер ынтымақтастық әлеуетін арттыруға және еңбеккерлердің лайықты еңбекке, лайықты өмірге және әлеуметтік әділеттілікке құқықтарын қорғауда жаңа мүмкіндіктер ашуға ниеттерін растады.
Салтанатты шараға қатысушыларды қарсы алған Әзербайжан Кәсіподақтар конфедерациясының төрағасы Саттар Мохбалиев түркі елдері арасында іргетасы 90-жылдардың басында қаланған тығыз бауырластық қарым-қатынастар бар екенін атап өтті.
Әзербайжан түркі бауырларымызбен бірге түркі мемлекетін құруға белсене атсалысуда. Барлық кедергілерге қарамастан, біз бұл қарым-қатынастарды сақтауға және дамытуға бар күшімізді салдық. Бауырлас елдермен ынтымақтастық халықаралық қатынастар аясында ерекше орын алады, - деді Саттар Мохбалиев.
Оның айтуынша, түркі әлемінің, атап айтқанда, кәсіподақ ұйымының құрылуы түркі мемлекеттерінің бірігуіне берік негіз қалады. Түркі халықтарының мақсат-мүдделерінің бірлігін өз сөзінде Қазақстан Республикасы Кәсіподақтар федерациясының төрағасы Сатыбалды Дәулеталин ерекше атап өтті.
Бізді, бауырлас түркі халықтарының өкілдерін ортақ тарихи тамыр, ортақ мәдениет пен дәстүр, ортақ мақсат пен ортақ мүдде біріктіреді. Түркі елдерінің ортақ мүдделері ғана емес, сан ғасырлық тарихы да ортақ екенін атап өткім келеді. Соңғы отыз жылда түркітілдес мемлекеттердің ынтымақтастығы табысты дамып, бұл механизмді үкіметаралық ұйымнан (Түркі кеңесі) аймақтық халықаралық ұйымға (ТМБ) дейін жетілдірді, - деді Сатыбалды Дәулеталин.
Қазақстан Республикасы Кәсіподақтар федерациясының төрағасы еңбеккерлердің құқықтары мен мүдделерін қорғау бойынша күш-жігерді бір ұйым аясында біріктіру жөніндегі бастамасын қолдағаны үшін әріптестеріне алғыс білдірді.
Біздің елдеріміздің ұлттық кәсіподақ орталықтары жұмысшылардың сенімді қорғаушысы және мемлекеттік органдар мен жұмыс берушілер бірлестіктерінің жауапты серіктесіне айналды деп сеніммен айта аламыз. Бүгінгі күні бірлігімізді нығайту, елдеріміздің кәсіподақтарының көпжақты ынтымақтастығына ортақ көзқарасты қалыптастыру аса маңызды. Осы орайда Түркі мемлекеттерінің кәсіподақтар ұйымын құру ерекше маңызға ие, - деп есептейді ҚР КФ басшысы.
Алдағы ынтымақтастықтың негізгі бағыттарының қатарында ол алдыңғы қатарлы кәсіподақ тәжірибесін ілгерілетуді, тәжірибе алмасуды және жалпы түркі мемлекеттерінің еңбек нарығындағы жағдайды өзгертуді атады.
Біздің түркі елдерінің ұлттық кәсіподақ орталықтары арасындағы жақындасуға және диалог орнатуға ұмтылысымыз ашық және сындарлы және үшінші тараптардың мүдделеріне қарсы бағытталмаған. Біздің мақсатымыз ортақ және жолымыз бір – бірге болу! Біздің ұйымның құрылуы көптен күткен оқиға. Бірақ бұл жолдың басы ғана және біздің бүгінгі кездесуіміз түркі интеграциясын дамытудың маңызды кезеңіне айналады, - деп есептейді Сатыбалды Дәулеталин.
«Türk-İş» түрік кәсіподақтары конфедерациясының президенті Эргюн Аталай өз кезегінде бауырлас елдердің кәсіподақ көшбасшыларына ынтымақтастықты нығайтудағы бірлескен маңызды қадамдары үшін алғыс айтып, әріптестерін негізгі халықаралық стандарттарды сақтау және ілгерілетудің маңыздылығын ескере отырып, жемісті бірлескен жұмысқа шақырды.
Егер күш-жігерімізді біріктіре алсақ, еңбегіміз бен талабымыз нәтижелі болады. Осы келісімге қол қою және оны кейіннен жүзеге асыру кәсіподақ қатынастарын, еңбекшілердің құқықтарын қорғауды, түркі мемлекеттерінің кәсіподақ ұйымдарының өзара іс-қимылын дамытудың жаңа кезеңіне әкелетініне сенімдімін, - деп қосты Ергюн Аталай.
Еңбекшілердің әл-ауқаты мен өсіп-өркендеуі үшін түркі мемлекеттері деңгейінде кәсіподақ ұйымдарын құрудың маңыздылығын Өзбекстан кәсіподақтар федерациясы төрағасының орынбасары Бахтиер Махмадалиев те атап өтті.
Түркі мемлекеттерінің кәсіподақ ұйымын құру еңбекшілердің мүдделерін тиімдірек қорғауға ғана емес, сонымен қатар біздің елдеріміздің кәсіподақтарының ортақ мүдделерін халықаралық деңгейде көрсетуге мүмкіндік береді, - деді Бахтиёр Махмадалиев.
Ұлттық кәсіподақ орталықтарының басшылары жаңа құрылымның құрылуы әр елдің кәсіподақ қозғалысы өміріндегі айтулы оқиғаға айналғанын атап өтті. Оның Шушада өтуінің символикасы кәсіподақ ынтымағын нығайту үрдісімен тығыз үндеседі. 28 шілдеде Кәсіподақтар федерациясының төрағасы Сатыбалды Дәулеталин жұмыс сапарымен Әзербайжан Республикасына келген болатын. ҚРКФ Төрағасының жұмыс сапары Бакуде Әзербайжан батырларын еске алу рәсімінен басталды.
Әзербайжан, Қазақстан, Түркия, Қырғызстан және Өзбекстан ұлттық кәсіподақ орталықтарының басшылары «Шейіттер» аллеясындағы мәңгілік алауға гүл шоқтарын қойып, Бакудегі Құрмет аллеясында болып, Әзербайжанның тұңғыш Президенті Гейдар Әлиевтің рухына тағзым етті.