Депутат Ермұрат Бәпи Бас прокурор Берік Асыловқа жолдаған депутаттық сауалында Қазақстан Республикасының мемлекеттік туын қорлау оқиғасына қатысты тергеуді жан-жақты жүргізуге шақырды, деп хабарлайды El.kz ақпарат агенттігі.
Депутаттың айтуынша, соңғы уақытта қазақ халқының тарихи мұралары мен ұлттық дәстүрлеріне шабуыл күшейіп барады:
Ту – әрбір қазақстандық үшін қасиетті құндылық. Оны бүлдіру – бүкіл халықты, тұтас мемлекетті қорлау! – деп мәлімдеді Бәпи.
Депутаттың сөзінше, Атыраудағы спорттық іс-шарада төрт әйел қара жамылып, бет-аузын тұмшалап, Қазақстан туын араб жазуы мен араби қылыштың суретімен ұстаған. Бұл сурет әлеуметтік желіде кең таралып, қоғамда үлкен резонанс тудырды.
Бізді алаңдататын нәрсе – көк тудағы араб жазуы арнайы баспа құралымен сапалы түрде басылған. Демек, бұл жай ғана тұрмыстық бұзақылық емес, бұл – Қазақстанның мемлекеттігіне, ұлттық дәстүріне, бірегейлігіне ашық қарсылық, – деді депутат.
Бәпи Қылмыстық кодекстің 372-бабына сүйене отырып, мұндай заң бұзушылық қатаң жазалануы керектігін айтты. Оның пікірінше, тек төрт әйел ғана емес, бұл әрекетті ұйымдастырушылар да жауапқа тартылуы керек.
Олар жастық албырттықпен, материалдық қызығушылықпен немесе діни сауатсыздықпен жасады. Бірақ мұның артында қандай да бір кереғар күштер тұр, – деді депутат.
Тағы бір даулы мәселе – Wildberries Russ маркетплейсінде сатылып жатқан Қазақстан туының бұрмаланған нұсқасы.
Бұл не сұмдық?! Бұған кім жол беріп отыр? – деп, Ермұрат Бәпи құқық қорғау органдарын шұғыл шара қабылдауға шақырды.
Депутат Қазақстанның зайырлы мемлекет екенін, діннің мемлекеттік саясаттан тыс екенін атап өтті. Дегенмен біздің ұлттық құндылықтарымыз заңмен қорғалады, сондықтан радикалды әрекеттерді жеке діни сенім мәселесі ретінде қарастыруға болмайды.
Бұл – қоғам тұрақтылығын бұзуға бағытталған арандатушылық! Бұл – ежелден қалыптасқан діни бірлікке сызат түсіретін қаскөй әрекет. Бұл оқиға алдын ала жоспарланған. «Бұл арандатушылықтың артында кім тұр? Ұйымдастырушылардың мақсаты не?» деген сұрақтарға құқық қорғау органдары нақты жауап беруі тиіс. Мұндай әрекеттер біздің тарихымызды, мәдениетімізді, ұлттық мақтанышымызды жоққа шығару мақсатын көздейді. Бұл – қазақ қоғамын жасанды радикалды нормалармен бөлшектеу әрекеті! – деп түйіндеді Ермұрат Бәпи.
Ол жауапты органдарға мынадай шаралар қолдануды ұсынды:
Сондай-ақ, тиісті заңнамаға мемлекеттілігімізді мансұқтайтын, қоғамды жікке бөлуді көздейтін тауарлар сатқан жекелеген маркетплейстерге қарсы санкция салуды көздейтін түзетулер әзірлеп, оны заң нормасына енгізу керек.
Сонымен қатар, тиісті уәкілетті мемлекеттік органдар ұлттық мәдениетті дамыту, дәстүрлі киім кию бастамаларын қолдау және жастар арасында кең көлемде түсіндіру жұмыстарын жүргізуі қажет.