17 Қараша 2016, 05:36
Жуырда Ш.Айманов атындағы «Қазақфильм» киностудиясы Т.Жүргенов атындағы Қазақ ұлттық өнер академиясының студенттеріне 1941 жылдың күзінде Мәскеуді қорғап қалған 316-атқыштар дивизиясына арналған екі тарихи картина – деректі және көркем фильмді көрсетті.
«Ел басына күн туса» көркем фильмі мен «316-ая стрелковая» деректі фильмдерінің көрсетілімі панфиловшы-батырлардың Мәскеу түбінде Волоколамск тас жолында неміс әскерін жеңген күніне 75 жыл толуына орай ұйымдастырылды.
Академияның кинозалында өткен көрсетілімнен кейін студенттер майдангер режиссер Мәжит Бегалиннің інісі Қасым Бегалин, ҚР Халық әртісі Нұржұман Ықтымбаевтармен сұхбат құрды.
«316-ая стрелковая» – Ұлы Отан соғысы кезінде құрмет белгісі ретінде қолбасшының атымен аталған жалғыз дивизия – Панфиловшы дивизиясына арналған деректі фильм. 1941 жылдың 16 қарашасы – Гитлер стратегиясының құрдымға кеткен күні. Фильм майдангер-жазушы Б.Момышұлының естеліктері негізінде түсірілген.
Өндірісі: «Ғафу студиясы»
Шыққан жылы: 2015
Ұзақтығы: 44 минут
Сценарий авторы әрі режиссері: Бақыт Қайырбеков
«Ел басына күн туса» – 1941 жылы Мәскеу түбінде шайқасқан және 1941 жылдың 22 желтоқсанында неміс әскеріне төтеп берген Панфилов дивизиясына арналған көркем фильм. Ол да Бауыржан Момышұлының кітаптары негізінде түсірілді.
Өндірісі: «Қазақфильм» киностудиясы
Шыққан жылы: 1967
Ұзақтығы: 89 минут
Режиссері: Мәжит Бегалин
Сценарий авторлары: Василий Соловьев, Мәжит Бегалин
Операторы: Асхат Ашрапов
Суретшілері: Виктор Леднев, Ыдырыс Қарсақбаев
Композиторы: Эдуард Хагагорян
Рөлдерде: Всеволод Санаев, Кәукен Кенжетаев, Владлен Давыдов, Асанбек Өмірәлиев, Қуатбай Әбдірайымов
Әзірлеген – Айбота Өтеулі