Солтүстік Қазақстан облысында қазақ киносының күндері басталды, деп хабарлайды El.kz ақпарат агенттігі.
Мұндағы басты мақсат - көпшілікті дарынды жерлес режиссерлермен және олардың картиналарымен таныстыру болып отыр. Дәл осы фильмдер ел мәдениетін ашып көрсетеді. Көптеген картиналар мемлекет тарихындағы негізгі кезеңдерді баяндап, көрнекті қоғам қайраткерлерінің өмірі мен қызметін таныстырады.
Қазіргі уақытта Мәдениет және ақпарат министрі Аида Ғалымқызы Балаева отандық киноны дамытуға ерекше көңіл бөлуде. Біз орталықтың қолдауымен түсірілген барлық жобаның көрерменге жетуін қалаймыз. Облыс орталығында ғана емес, аудандарда, ауылдарда да бұл бағыттағы жұмысты тұрақты негізде жүргізетін боламыз», – деді Ұлттық кинонықолдау мемлекеттік орталығы КЕАҚ Басқарма төрағасы Құрманбек Жұмағали.
Сонымен қатар Ұлттық киноны қолдау орталығы республикалық қана емес, өңірлік телеарналармен де белсенді әруптестік орнатқан. Солтүстік Қазақстан телеарналарында отандық фильмдер үзбей көрсетіліп жүр. Қазақ киносының онкүндігі аясында «Qyzyljar» Creative Center» орталығында «Первый Северный» телеарнасымен ынтымақтастық меморандумына да қол қойылды.
Кино күндері аясында әртүрлі жанрдағы фильмдер ұсынылмақ. Айта кетейік, бұған дейін Кино орталығының қолдауымен 117 картинаның өндірісі аяқталды. Оның 72-сі – көркем, 37-сі – деректі, 8-і – анимациялық фильмдер.