Kazakhmys компаниясының баспасөз қызметі Сәтбаевтағы қара қарға қатысты түсініктеме берді, деп хабарлайды El.kz ақпарат агенттігі.
"Kazakhmys Distribution" компаниясы Сәтбаевта қара қардың түсуіне қатысы бар екендерін жоққа шығарды.
“Бірқатар БАҚ-та 2024 жылғы 31 қаңтарда Сәтбаев қаласында ластанған қар түрінде жауын-шашын түскені туралы ақпарат тарады. Бұл оқиғаны жылу, электр энергиясын өндіру, беру, тарату және жабдықтау, сумен жабдықтау және су бұру саласында қызмет көрсететін "Kazakhmys Distribution" ЖШС қызметімен байланыстыруда. Компанияда қолданылатын тазарту жабдықтары ескірген және қалыпты жұмыс істемейді деп те айтылған. Бұл ақпарат шындыққа жанаспайды, - делінген Kazakhmys компаниясының мәлімдемесінде.
Компанияның мәлімдеуінше, Сәтбаев қаласының шетінде орналасқан №1 жылу станциясы қаланы және оған іргелес өндірістік нысандарды жылу энергиясымен және ыстық сумен қамтамасыз етеді. Онда үш ұйымдастырылған шығарындылар көзі бар:
1. Тазалау коэффициенті 98,5-99% болатын күл ұстайтын жабдық орнатылған ПТВП-100 су жылыту қазандықтарының түтін құбыры.
2. ДКВР 10/13 бу қазандықтарының түтін құбыры, онда 80-92% тазарту коэффициенті бар өнімділігі 26000м3/сағ күл ұстайтын қондырғылар жұмыс істейді.
3. Жобалық шешімге сәйкес орындалған ашық көмір қоймасы.
Компания 31 қаңтарда "Kazakhmys Distribution" ашық қоймасында көмір түсірілгенін түсіндірді. 20-25 м/с дейін екпіні бар қатты желдің нәтижесінде көмір шаңының көптеген ұсақ бөлшектері Сәтбаевтың тұрғын алаптарына қарай ұшқан.
Бұл форс-мажордың тазарту жабдықтарының жұмысына ешқандай қатысы жоқ. Күл ұстайтын қондырғылардың жұмысы штаттық режимде жүргізіледі. Айта кету керек, жылыту маусымына дайындық кезеңінде жыл сайынғы негізде ағымдағы жөндеу жұмыстары жүргізілуде. Оның ішінде су жылыту және бу қазандықтарының күл ұстайтын қондырғыларына жөндеу және қызмет көрсету жүргізілуде, – деп түсіндірді компания.