Қазақстанда 2025 жылы өтетін Sanremo Junior халықаралық ән байқауының ұлттық іріктеуі басталды, деп хабарлайды El.kz ақпарат агенттігі.
Бұл байқау – жас өнерпаздарға өз талантын көрсетуге мүмкіндік беретін әлемдік деңгейдегі беделді жоба. Ән айтуды сүйетін 6 мен 15 жас аралығындағы балаларға арналған байқау дарынды жас қазақстандықтардың өнерін халықаралық сахнада танытуға мүмкіндік береді.
Қазақстандағы іріктеу кезеңі бірнеше маңызды кезеңнен тұрады. Ең алдымен қатысушылар өз өнерін онлайн түрде көрсетіп, қазылар алқасының назарына ұсынады. Қазылар құрамында еліміздегі танымал әншілер, музыкалық продюсерлер мен өнер майталмандары бар.
Әрбір қатысушының вокалдық шеберлігі, сахналық образы және өзіндік ерекшелігі қазылардың басты назарында болады. Бұдан өзге Ақтөбе қаласының филармониясында өтетін музыкалық мегажобаның ұлттық іріктеуінің жартылай финалы және финалдық кезеңі өтпек.
Ұлттық іріктеудің қорытындысы бойынша ең үздік деп танылған жас өнерпаз Италияның Сан-Ремо қаласында өтетін байқаудың финалына қатысу құқығына ие болады. Бұл тек қазақстандық өнерпаз үшін ғана емес, бүкіл еліміз үшін үлкен мәртебе. Сан-Ремо сахнасында Қазақстанның атын әлемге танытатын қатысушы өз елінің мәдениетін, ұлттық бояуын және дарынын көрсетеді.
Sanremo Junior – 2025 байқауы таланттарды анықтап қана қоймай, балаларға өнер әлеміне жол ашатын платформа. Бұл жас әншілердің шығармашылық әлеуетін дамытуға, халықаралық деңгейде тәжірибе жинауға, сондай-ақ жаңа достар табуға, өз шеберлігін арттыруға үлкен мүмкіндік.
Ұлттық іріктеуге қатысқысы келетін балалар мен олардың ата-аналары байқаудың ресми ережелерімен және өтінім беру тәртібімен арнайы сайтта таныса алады. Қазақстанның талантты жастары әлем сахнасында жарқырайтын кез келді.
Мақала авторы: Мейірлан Төлеуіш