Депутаттардың бастамасымен тұқым шаруашылығын қолдау туралы заңнамаға енгізілетін өзгерістер талқыланды, деп хабарлайды El.kz ақпарат агенттігі.
Сарапшылардың мәліметінше, Қазақстанға картоп тұқымының 95%-ы шетелден әкелінеді. Салада тұқымның төмен сапасы, тұқымның өту жолдарын тиісті деңгейде бақыламау, тұқым контрабандасы, селекционерлердің құқығын сақтамау сынды мәселелер бар. Осыған байланысты тұқымдарды тексеру және сертификаттау жүйесін дамыту керек.
Мамандар Нидерланды Корольдігінің үлгісін мысалға келтіріп, тұқым сапасын бақылаудың ашық жүйесін құруды ұсынды. Олар елімізде тұқымдарды тексеру мен сертификаттаудың жаңартылған жүйесін енгізу маңызды деген пікірде.
Шетелдік сарапшылар, Өсімдіктер биологиясы және биотехнологиясы институты, Қазақ бау-бақша шаруашылығы ғылыми-зерттеу институты, ҚазАТИУ, Парламентаризм институтының ғалымдары, Қазақстан картоп және көкөніс өсірушілер одағының және басқа да мүдделі ұйымдардың өкілдері аталған мәселеге қатысты өз пікірлерін айтты.
Біз тұқым шаруашылығы жүйесін реформалауды бастадық. Тұқым шаруашылығын қолдау мәселелері бойынша заңнамаға толықтырулар мен өзгерістер енгізу тұқым сапасын бақылаудың ашық, логикалық, тәуелсіз жүйесін құруға мүмкіндік береді. Мемлекет саланы реттеуге аккредиттеу, жыл сайынғы есептер және жаңа ережелер мен олардың мәлімдемелерін әзірлеуде барлық мүдделі ұйыммен тығыз өзара әрекеттесу маңызды, - деді Мәжіліс депутаты, Respublica партиясының төрағасы Айдарбек Қожаназаров.