Қарағандылық оқушы Адина Жайлова Американың үздік төрт университетіне оқуға шақыру алды, деп хабарлайды El.kz облыс әкімдігіне сілтеме жасап.
Ол Джон Хопкинс университетін таңдап, биохимияны зерттеуді жоспарлап отыр.
Адина 12-сыныпта оқиды. Ол өз өтінімдерін бірнеше әлемдік жоғары оқу орындарына жіберді. Джон Хопкинс университетіне (John Hopkins University), сондай-ақ Питтсбург (University of Pittsburgh), Мичиган штатындағы (Michigan State University) және Бостондағы (Northeastern University) университеттерге оқуға шақыру алды, ‒ делінген Қарағанды NIS таратқан ақпаратта.
John Hopkins University университетінде іріктеуден өту өте қиын. Жыл сайын оған 30 мыңнан астам адам түсуге тырысады, бірақ үміткерлердің тек 6% ғана өтеді. Бұл АҚШ-тағы оқыту мен ғылымды біріктірген алғашқы оқу орны. Джон Хопкинс университетінің түлектері арасында Нобель сыйлығының 27 лауреаты бар.
‒ Университетте биохимияны оқығым келеді. Менде екінші курстың соңында мамандық туралы шешім қабылдауға мүмкіндігім бар. Қазақстанда ғылымның дамуына өз үлесімді қосу үшін PhD алуды жоспарлап отырмын, ‒ дейді Адина Жайлова.
Оның айтуынша, қазір ол бар күш-жігерін оқуға және өзін-өзі дамытуға толығымен аударып отыр, бірақ спортқа да уақыт қалады. Футболды жақсы көреді.