23 сәуір – Дүниежүзілік кітап күні. Бұл мерекені көпшілік үшін пайдалы іс-шара ретінде лайықты деңгейде атап өтудің маңызы зор. Осыған орай «Qazcontent» АҚ қарасты «Әдебиет» порталы «Менің кітапханам» атты челлендж жариялап, көпшілік қауымды кітап оқуға шақырып отыр. Мұндағы мақсат - кітап оқу мәдениетін дамытып, белсенді түрде кітап оқуға тарту. Акцияға еліміздің кез келген оқырманы қатыса алады.
Басты талап – кітап оқудың маңызы туралы айта отырып, соңғы оқылған шығарма жайлы қысқаша баяндап өту. Көркем шығармаға шектеу қойылмайды. Әлемдік немесе ұлттық әдебиеттің олжасына айналған туынды болуы әбден мүмкін.
Бүгінде челленджді еліміздің танымал қаламгерлері қолдап, жарыса бейнеүндеу түсіруде. Олардың қатарында «24kz» телеарнасының тележурналисі, ақын әрі балалар жазушысы Азамат Әбілқайыр, Qazaqstan ұлттық телеарнасының продюссері, «Ашық алаң» саяси ток-шоуының жүргізушісі Ерқанат Көпжасар, Күләш Байсейтова атындағы Қазақ ұлттық өнер университетінің оқытушысы, ақын, жазушы, киносценарист Ұларбек Нұрғалымұлы, танымал спорт журналисі Ермұхамед Мәулен, жазушы әрі баспагер Арман Әлменбет пен белгілі ақын, журналист Мирас Асан да бар.
Порталдың бастамасын қолдап, өзімнің соңғы оқыған кітабым жайлы айтқым келіп отыр. Ол - Әкім Таразидің «Тәж» атты туындысы, яки эсселер жинағы. Шығармашылық сыр деп те айтуға болады. Кезінде бірге жұмыс істеген тұлғалар туралы сыр. Әсіресе Мәжит Бегалин, Нұрғиса Тілендиев және өзге де көптеген тұлғаға қарым-қатынасы және солардың шығармашылық ішкі әлемі туралы керемет сыр шертетін кітап деуге болады,-деп түсіндірді жазушы, киносценарист Ұларбек Нұрғалым.
Ал белгілі ақын Мирас Асан:
Кітапты өртеуден де үлкен қылмыс бар. «Ол - кітапты оқымай қою» дейді Рей Бредбери. «Әдебиет» порталы кітап оқу үрдісін жаңғырту жолында «Менің кітапханам» атты жаңа жобаны қолға алды. Осы керемет бастаманы ерекше жылы қабылдадық. Осылайша өзіміздің кітапханамызға қайта үңіліп, кейінгі уақытта оқыған бір кітаппен бөліскім келіп отыр. Менің қолымда Рей Бредберидің «Фаренгейт бойынша 451 градус» атты антиутопиялық романы бар. Бұл - кітап оқымайтын қорқынышты қоғам жайлы керемет шығарма. Гай Монтэг деген басты кейіпкері бар. Ол кітапханасы бар үйді өртеуші бригаданың өкілі. Бір қызығы, кейіпкер өртеп жүрген кітаптарын ұрлап, үйіне апарып оқып, әдебиет әлеміне қалай «жұтылып» кеткенін білмей қалады. Бір сөзбен айтқанда, цифрлы цивилизация мен әріптер әлемінің шайқасы жайлы керемет роман. Оқуға кеңес беремін!, - деп ағынан жарылды.
Ал сіз, құрметті оқырман, кітапты қолыңызға алып, оқиға желісіне соңғы рет қашан бойладыңыз? Ойыңызбен бөлісе отырып, челленджді қолдауға шақырамыз!