Париждегі Олимпиадаға дайындық аясында Мәдениет және спорт министрлігі арнайы бағдарлама әзірледі. Оның маңызды тармақтарының бірі заманауи жабдықтарын сатып алудың жаңа нормаларын бекіту, сондай-ақ осы мақсатқа қосымша қаражат бөлу, деп хабарлайды El.kz ақпарат агенттігі.
2017 жылы бекітілген нормалар басқа елдердің құрама командаларына бөлінетін қолжетімді, үнемі жаңартылып отыратын және жаңа буын жабдықтарын сатып алуға мүмкіндік бермегенін атап өткен жөн.
«2023 жыл – Олимпиадаға дейінгі, ұлттық құрама командаларды даярлау тұрғысынан ең маңызды жыл. Ірі жарыстарда жеңіске жету үшін, ең алдымен, ерік-жігер, табандылық, спорттық руһ пен тәртіп қажет екені анық, бірақ инфрақұрылымның атқаратын рөлін естен шығармаған жөн. Сондықтан тиісті жағдайларды жасау үшін біз жабдықтарды жаңарту және сатып алу жұмыстарын жүргіздік. Енді соңғы нәтиже толығымен спортшыға байланысты. Сіздерге жеңіс тілеймін. Осы мүмкіндікті пайдалана отырып, баршаңызды келе жатқан Жаңа жылмен құттықтаймын», - деді Мәдениет және спорт министрі Дәурен Абаев.
Барлығы 28 жазғы және қысқы олимпиадалық және 3 паралимпиадалық спорт түрлері бойынша жабдықтар берілді.
Өз кезегінде спортшылар осы мәселені шешкені үшін бейінді мекемеге алғыстарын білдірді.
«Бүгінде кәсіби спортшылар технологиямен қамтамасыз етіліп отыр. Бұл жерде жаттығу процесі, жарыстар мен демалыс туралы айтуға болады. Дегенмен, прогресс соншалықты тез болғандықтан, жыл сайын әртүрлі жабдықтар мен жаттығу құралдарының жетілдірілген модельдері пайда болуда. Сондықтан қазақстандық спортшыларға мұның бәрі қолжетімді екені қуантады. Бұл мемлекеттің спортты дамытуға жоғары көңіл бөлетінінің көрсеткіші», - деп атап өтті қазақстандық конькимен жүгіруші, шорт-тректен халықаралық дәрежедегі спорт шебері Денис Никиша.
Спортшыларға трек және жол жарыстарына арналған құралдар (велоспорт), қайықтар, ескектер және жүрек соғу жиілігінің мониторларын (байдарка мен каноэде есу), ашық суда жүзуге арналған тренажер-4D, синхронды жүзуге арналған портативті жүйе сатып алынды. Жазғы спорт түрлерінде катушкалар мен арнайы кейстер (семсерлесу), доп таяқтар мен жабдықтар (доппен хоккей), ракеткалар (үстел теннисі), жиынтықтар, кимоно, трико және аяқ киім (таеквондо, дзюдо, пара дзюдо және күрес түрлері) қарастырылған. Сонымен қатар, қысқы спорт түрлері де назардан тыс қалмады. Олар велосипедтер, коньки мен комбез (шорт-трек және конькимен сырғанау), шаңғы, таяқ, етік және бекіткіштер (шаңғы жарысы және биатлон, пара шаңғы жарысы және пара биатлон), шаңғы және бекіткіштер (фристайл, трамплиннен секіру) алады.