Nazarbayev University-де премьер-министрінің орынбасары Ермек Көшербаевтың қатысуымен Deeptech Бәйге конкурсының финалдық питчингі өтті, деп хабарлайды El.kz ақпарат агенттігі.
Deeptech Бәйге – инкубация, акселерация, Jas Venture, Go Abroad және басқалары сияқты NU стартаптарын қолдау бағдарламаларының барлық түлегінің жобаларын біріктіретін алғашқы ірі жергілікті іс-шара. Байқаудың жалпы жүлде қоры 35 млн теңге болды.
Финалда 10 стартап өз жобаларын таныстырды, олар медицинадағы жасанды интеллекттен бастап, ауыл шаруашылығындағы озық мониторинг жүйелеріне дейін әртүрлі салаларда инновациялық шешімдер ұсынды. Әр жоба үш минуттық питчингтен өтіп, одан кейін стартаптың негізін қалаушылар қазылар алқасының сұрақтарына жауап берді. Сарапшыларды жобалардың ерекшелігі, нарықтық әлеуеті, әрі қарайғы жоспарлары және таныстырылған технологияларды практикалық қолдану мәселелері қызықтырды. Соңында ҚР Премьер-министрінің орынбасары Ермек Көшербаевтың басшылығымен ғылым, білім және бизнес салаларының жетекші өкілдерінен тұратын қазылар алқасы қорытынды шығару үшін ақылдасу бөлмесіне ауысты.
Бірінші орын мен 12 млн теңгені жауынгерлік дрондарды жасауға арналған инновациялық платформа – GAME OF DRONES стартабы жеңді. Ол симуляциялардың арқасында оқытудың неғұрлым қолжетімді және тиімді әдістерін пайдаланады. Қазіргі уақытта бұл жобаның 23 елден 10 мыңнан астам пайдаланушысы бар. Стартаптың негізін қалаушы Абылайхан Жақанов бұл платформа – киберспорттың жаңа форматы, мұнда ойыншылар қозғалыс жасау арқылы шынайы техниканы басқара алатынын айтты. Алайда бұл технологияның әлеуеті одан да жоғары: стартаптың шешімдерін аграрлық секторда, қорғаныс және өндіріс салаларында қолдануға болады. Осы платформа негізінде команда ұшқыштарды даярлау құнын айтарлықтай төмендетуді ұсынып отыр, мәселен, әскери қызметкерлерді даярлау құнын 100 есе азайтуға болады.
2-орын мен 10 млн теңгені геймификация мен AI әдістерін қолданатын инсультті қалпына келтіруге көмектесетін цифрлық терапия жүйесі – FLECTION.AI стартабы алды. Платформаның негізін қалаушысы, NU профессоры Александр Пактың айтуынша, платформа Астанадағы клиникалармен бірлестікте 200 пациентке сыналып, оң нәтиже берген. Команда үй жағдайында оңалту бойынша америкалық нарыққа шығуды көздеп отыр.
3-орын мен 8 млн теңгені GRANULO SYSTEM жобасы жеңді. Бұл тау-кен өнеркәсібіндегі өндірістік процестерді жақсарту үшін кен фракциясын талдау жүйесі. Ол конвейердегі кен мөлшерінің орналасуын бақылауға көмектеседі, бұл шар диірменінің жұмысын және бұрғылау-жару жұмыстарын бақылауды жақсартады.
Көрермен көзайымы сыйлығы мен 5 млн теңгені HEMO LAB медтех-стартабы олжалады. Ол – дәл диагноз қою уақытын 10 есе қысқартып, 95% дәлдікпен ауруларды ерте диагностикалауға арналған SaaS-платформасы.
Сонымен қатар барлық стартап алдында тәлімгерлік бағдарламаларына қатысу және индустриялық серіктестермен ынтымақтастық орнату мүмкіндіктері ашылды, бұл оларға өз жобаларын кеңейтіп, жаңа нарықтарға шығуға көмектеседі.
Байқауға қатысуға өтінімдерді жинау қаңтар айының соңында басталды. Жалпы 100-ге жуық өтініш түсіп, жетекші бизнесмендер мен венчурлық инвесторлардан тұратын қазылар алқасының шешімімен финалға тек 10 жоба ғана өтті. Ғылыми әзірлемелер мен инновацияларды ілгерілетуге, сондай-ақ халықаралық деңгейде бәсекеге қабілетті deeptech-стартаптардың экожүйесін қалыптастыруға бағытталған бастаманы «Әлеуметтік даму қоры» ҚҚ қолдады.
NU алдағы уақытта еліміздің басқа университеттерін де қосып, байқауды кеңейтпек. Ұзақ мерзімді жоспарлардың ішінде стартаптарды қолдау қорын құру мақсаты бар, ол тұрақты негізде Deeptech Бәйге өткізіп отыруға мүмкіндік береді.
Deeptech Бәйге-2025 финалистері:
COWMAS – малдың жағдайын бақылайтын AI-жүйе, қазіргі кезде 700 бас бойынша қызмет көрсетуде. Жоба мал шаруашылығының тиімділігін арттыруға және шығындарды азайтуға бағытталған.
GAME OF DRONES – симуляциялау арқылы қолжетімді және тиімді оқыту әдістерін ұсынатын инновациялық дрон дайындау платформасы. Қазіргі нәтиже: 23 елден 10 мыңнан астам пайдаланушы.
HEMO LAB – дәл диагноз қою уақытын 10 есе қысқартып, 95% дәлдікпен ауруларды ерте диагностикалауға арналған SaaS-платформасы.
KIENG – жабдықтың қызмет көрсету көрсеткіштерін алдын ала болжайтын AI-камералар. Олар өндірістегі үзілістер мен ақауларды анықтауға көмектеседі. EFES Kazakhstan және Alstom-да пилоттық негізде енгізілген.
LUMISOLCOAT – энергетика саласына арналған күн панельдерінің тиімділігін арттыратын гидрофобты және люминесцентті жабын.
MULTICODE – логистикалық тиімділікті арттыратын AI көмегімен вагон паркін басқаруға арналған B2B SaaS-платформа.
ODEP LAB – ғылыми зерттеулерді оңтайландыруға және R&D процестерінің дәлдігін жақсартуға арналған AI агенттері. Қазіргі нәтиже: зерттеулердегі тәлімгерліктен $6O,OOO кіріс, Сингапурда 2 алдын ала сату.
OUTPEER – генеративті жасанды интеллектті қолдана отырып, жеке кәсіби даму платформасы. Қазіргі статус: нарықта – 4 жыл, 10 + оқу бағыты, 2 200 + түлек.
FLECTION.AI – геймификация мен AI әдістерін қолданатын инсультті қалпына келтіруге көмектесетін цифрлық терапия жүйесі.
GRANULO SYSTEM – тау-кен өнеркәсібіндегі өндірістік процестерді жақсарту үшін кен фракциясын талдау жүйесі. Конвейердегі кен мөлшерінің орналасуын бақылауға көмектеседі, бұл шар диірменінің жұмысын және бұрғылау-жару жұмыстарын бақылауды жақсартады.