Отандық танымал әнші Мирас Жүгінісов халықаралық Victoires de la Musique байқауына қатысу үшін Францияға аттанбақ, деп хабарлайды El.kz ақпарат агенттігі.
Мирас елдегі турын аяқтап, енді жаңа кезеңге аяқ баспақ. Ол әлемдік сахнаны бағындыруды көздейді.
Алдыңғы турға қарағанда бұл турдан көбірек шабыт алып, жаңа күшпен келдім, - деді әнші.
Жас жігіт аз уақыттың ішінде қазақстандық тыңдармандардың сүйікті әншісіне айналып шыға келді. Оның концерттеріне билет те алдын ала сатылып кетеді. Енді ол Францияда өнер көрсетпек.
Оқи отырыңыз:
Францияға барғым келеді, француз музыкасы қатты ұнайды. Қазақтың туын Францияда көтерсем деген жоспарым бар, - деді Жүгінісов.
Бұған дейін ол АҚШ-тың үш штатында, Моңғолия мен Қырғызстанда жеке концерттерін берген.
Өнерпаз 2021 жылдан бері жеке өнер көрсетіп келеді. Оның «Зымыран», «Әндетемін» әндері жұртшылық арасында кеңінен танымал.