ҚР Парламенті Сенатының төрағасы Мәулен Әшімбаев әйелдер қауымын 8 наурыз – Халықаралық әйелдер күнімен құттықтады, деп хабарлайды El.kz ақпараттық агенттігі.
«Аяулы арулар! Сіздерді Халықаралық әйелдер күнімен шын жүректен құттықтаймын! Бұл күн – мейірімнің, әдеміліктің және нәзіктіктің мерекесі. Сондықтан дәл осы күні аналарымызға құрмет көрсетіп, аруларымыз бен қыздарымызды құттықтауға асығамыз»,-деп жазды Сенат төрағасы өзінің Facebook парақшасында.
Сондай-ақ Мәулен Әшімбаев елдің ырыс-ынтымағын еселеу жолында бүгінгідей шуақты мерекенің маңызы зор екендігін айтты. Өйткені дәл осы күні ізгілік, сыйластық, сүйіспеншілік сияқты дұрыс құндылықтар дәріптеледі.
Шын мәнінде, мемлекеттің ілгері жылжып, еңсе тіктеуінде әйелдер қауымының алар орны ерекше. Тарихымызда даналығымен танылған аналарымыздың өмір жолы соның айқын дәлелі.
Қазіргі таңда да сіздер отбасының ғана емес, тұтас ұлттың ұйытқысы ретінде барлық салада табысты еңбек етіп, тәуелсіз Қазақстанның өсіп-өркендеуіне үлкен үлес қосып келесіздер. Мемлекет басшысының бастамасымен іске асырылып жатқан Әділетті Қазақстан құру жолында да әйелдердің ақыл-парасаты мен ерік-жігері маңызды рөл атқарады.
«Бүгінгі мейраммен құттықтай отырып, баршаңызға зор денсаулық, ұзақ ғұмыр, отбасыларыңызға бақ-береке және жаңа жеңістер мен жетістіктер тілеймін! Әрдайым көктемдей құлпырып жүре беріңіздер. Мереке құтты болсын!»,-деп жазды Сенат спикері.