Лос-Анджелес маңында тағы өрт шығып, 31 мың адам үшін міндетті эвакуация жарияланды, деп хабарлайды El.kz ақпарат агенттігі.
Небәрі бес сағатта қызыл жалын 32 шаршы шақырымға таралған. Билік өкілдері Кастаик көлінің маңын мекендейтін тұрғындарға өміріне қауіп төніп тұрғанын ескерткен.
Los Angeles Times мәліметінше, «Хьюз» өрті Лос-Анджелестен солтүстікке қарай 80 шақырым жерде басталып, батыста Вентур, солтүстікте Сандберг округтеріне дейін жеткен.
Бұған дейін Лос-Анджелестен шығысқа қарай 57 шаршы шақырымның күл-талқанын шығарған «Итон» өрті 91%-ға ауыздықталды. Ал шаһардан батысқа қарай 95 шаршы шақырымға таралған «Палисейдс» өрті 68%-ға ауыздықталды.