Тараз қаласында орналасқан «Жеңіс» саябағы — тек қана табиғаттың әсемдігі мен тыныштығымен емес, тарихтың терең іздерімен де ерекшеленетін орын. Бұл саябақ 1985 жылы Жеңістің 40 жылдығына орай соғыс және еңбек ардагерлерінің бастамасымен Жеңістің мәнін ұғындырып, батырларды ұлықтау мақсатында салынған.
2010 жылы саябаққа Кеңес Одағының Батыры, әйгілі қолбасшы Бауыржан Момышұлының есімі берілді. Ал 2019 жылы саябақ толықтай жөндеуден өтіп, жаңа келбетке ие болды. Жөндеу жұмыстары барысында саябақтың құрылымы жаңартылып, көркемдік өңдеулер мен қосымша мемориалдық кешендер салынды.
15 гектар аумақты алып жатқан «Ерлік» мемориалдық кешені өз сәулетімен көз тартады. Облыстық драма театрдың алдынан көшіріліп әкелінген батыр Бауыржан Момышұлының мүсіні осы жерге тамаша орналасқан. Ескерткіштің екі жағында Жамбыл облысынан шыққан 48 Кеңес Одағы Батырының «Алтын жұлдызы» жарқырап тұр, ал алдында орналасқан «Мәңгілік алау» ерлік пен өрліктің өшпес рухын паш етіп, ұрпақ санасына «Даңқ» деген құндылықты ұқтырып тұрғандай.
Батыр Бауыржан Момышұлы мен 48 батырдың есімдері жазылған мәрмардан соғылған «Даңқ» мемориалы артында 105 мыңға жуық жауынгердің есімі қашап жазылған. Қазіргі таңда бұл бүгінгі буынның өз аталарын іздеп, ұзақ уақыт кідіретін қасиетті орынға айналды. Кешенге кіретін бас қақпаның ені 13, биіктігі 8 метрге жетіп, алыстан көрініп, өзінің әсемдігімен таңқалдырып тұр.
Мұнда жауһардай құнды жәдігерлер көп. Әсіресе, алыстан көрінетін 5 артиллериялық зеңбірек пен қатар-қатар орналасқан 7 ауыр әскери техника кешеннің сәнін әрі мәнін арттырып тұр.
Жеңіс саябағында Тыл еңбеккерлеріне арналған монумент те ерекше орын алған. Бұл ескерткіш Ұлы Отан соғысы жылдарында елдің бейбіт өмірін сақтап қалу үшін қажырлы еңбек еткен, майданда болмаса да, алдыңғы шепте жұмыс істеген адамдардың құрметіне қойылған.
Монумент Тыл еңбеккерлерінің ерлігін, олардың күш-жігері мен жанқиярлық еңбегін мәңгі есте сақтауға арналған. Ескерткіш – ел тағдырына бейжай қарамаған, сол кездегі ауыр кезеңдерде еңбек еткен азаматтардың абыройы.
"Жеңіс" саябағының төрінде орналасқан "Даңқ залы" — бүгінгі ұрпақтың батыр бабаларына деген құрметі мен олардың ерліктерін мәңгілікке сақтау мақсатында салынған ерекше орын. 1500 шаршы метр аумақты алып жатқан зал — соғыс жылдарындағы батырлардың ерлігін, халқымыздың қаһармандығын бейнелейтін ғажайып нысан. Мұнда әрбір бұрыш, әрбір сурет, әрбір экспонат өз тарихын айтып тұрғандай.
Залдың бірінші қабатында орналасқан 1 миллион 500 мың фотосурет шежірелері өткен соғыстың ауыр жылдарынан сыр шертеді. Қабырғаға салынған суреттерге қарап, алыстан бір ғана жауынгердің бейнесін көргендей боласыз, бірақ жақындап барғанда оның ішінен мыңдаған басқа да бейнелерді көресіз. Әр сурет — сол кезеңнің қасіретін, батырлықты және халықтың ұлы ерлігін жеткізетін маңызды жәдігер.
Залдың қабырғалары Ұлы Отан соғысының ең маңызды оқиғаларын бейнелейді. 1941 жылға арналған қабырғада "Барбаросса жоспарының" картасы мен Мәскеу үшін болған шайқастың көрінісі көрініс тапқан. Ал 1942 жылы орын алған Ленинград блокадасына арналған қабырғада Жамбыл Жабаевтың суреті мен оның "Ленинград өренім" атты өлең жолдары жазылған. Мұнда сонымен қатар, Сталинград, Курск шайқастары мен Жеңіс күнінің лебі сезілетін 1944-45 жылдардағы көріністер де бар.
Ең қызығы, "Даңқ залы" — жастар мен келушілердің патриоттық сезімін оята отырып, оларды өткен тарихты тереңірек түсінуге жетелейді. Жастардың бұл залға деген қызығушылығы зор, себебі мұнда әрбір экспонат, әрбір қабырға тарихты көзбен көруге, оны сезінуге мүмкіндік береді. Бұл залды көру арқылы бүгінгі ұрпақ батырларымыздың ерлігін және ұлы жеңістерімізді ешқашан ұмытпауы тиіс екенін терең түсінеді.
«Жеңіс» саябағы – тек Тараз қаласының көрнекі бөлігі ғана емес, сонымен қатар ел тарихының терең тамыры мен батырларымыздың ерліктерін мәңгілікке сақтап, жаңа ұрпаққа патриоттық рух сыйлайтын маңызды мәдени мұра. Бұл жер біздің өткеніміздің құндылықтарын қадірлеп, келешек ұрпаққа даңқ пен ерліктің мәнін түсіндіретін қасиетті орын болып қала береді.