Халықаралық істер, қорғаныс және қауіпсіздік комитетінің мүшелері Алматы облысындағы шекара бекетінде дайындықтан өтіп жатыр, деп хабарлайды El.kz ақпарат агенттігі.
Мәжіліс депутаттары - Максим Рожин, Олжас Құспеков, Болат Керімбек және Самат Нұртаза 31 шілдеге дейін шекарада болады. Алғашқы бес күнде, 16-21 шілде аралығында олар далада дайындықтан өтіп, ҰҚК Шекара академиясының курсанттарымен бірге практикалық сабақтарға қатысады. Қалған күндері екі топқа бөлініп, Қытай және Қырғызстан шекараларында қызмет етеді.
Депутаттар шекара бөлімшелерінің, шекаралық бақылау басқармаларының, заставалардың, бақылау-өткізу бекеттерінің және т.б жұмысын жеке өздері зерттейтін болады. Әскери қызметшілермен бірге шекара наряды, бақылау-өткізу пункттеріндегі тексерулерге, тактикалық дайындық және т.б. қатысады.
Жоба барысында депутаттар ұлттық қауіпсіздік жүйесін жетілдіруге бағытталған жаңа заңнамалық бастамалар мен шараларды әзірлеу қажеттілігін, жастарды патриоттыққа тәрбиелеудің тәсілдерін, әскерде қызмет ету жағдайларын жақсартуды көздеп отыр.