Бектенов LRT жобасын іске асыру барысын тексерді

Премьер-министр Олжас Бектенов Астана қаласы бойынша жұмыс сапары аясында Мемлекет басшысының халықты жылумен қамтамасыз ету және LRT жобасын іске асыру жөніндегі тапсырмаларының орындалу барысын тексерді, деп хабарлайды El.kz ақпарат агенттігі.

«Тұран» газ жылу стансасында Премьер-министрге нысан құрылысының екінші кезегі аяқталғаны туралы баяндалды. Бүгінде дайындық 98%-ды құрап отыр. Жүргізілген жұмыстардың нәтижесінде ГЖС жалпы қуаты сағатына 350-ден 600 Гкал-ға дейін жеткізілді – бүгінде бұл еліміздегі ең ірі газ жылу стансасы. «Тұран» ГЖС басқа 4 жылу көзі: ЖЭО-1, ЖЭО-2, ЖЭО-3, «Оңтүстік-Шығыс» газ жылу стансасымен елорданы жылумен қамтамасыз етеді. Нысандардың жалпы қолжетімді қуаты сағатына 4 104 Гкал-ды құрайды, қаланың ең жоғары жылу тұтыну қажеттілігі 3 578 Гкал/сағ, бұл ағымдағы жылыту кезеңінде жылу қуатын шамамен 500 Гкал/сағ артығымен өндіруді қамтамасыз етті.

Қала әкімінің орынбасары Ерсін Өтебаев бүгінде «Тұран» ГЖС жұмысы толығымен автоматтандырылғанын айтты. Мамандарды даярлау оқу орталығының базасында дуальды білім беру шеңберінде жүргізіледі. Стансада неміс, орыс және фин технологиялары қолданылады. ГЖС жоғары экологиялық таза екендігі атап өтілді: азот оксиді қалдықтары қолданыстағы нормативтермен салыстырғанда 3-5 есе азайды. Қазіргі уақытта нысан Есіл және Нұра аудандарын, сондай-ақ шамамен 2 млн шаршы метр алаңдағы әлеуметтік және өнеркәсіп нысандарын жылумен қамтамасыз етеді. Газ тарту және қаланы жылумен қамтамасыз ету жұмыстары жалғасады. 2035 жылға дейін жылумен жабдықтау саласында ЖЭО-2-де 7, 8 қазандықтарды пайдалануға беруді, «Тельман» ГЖС және «Оңтүстік-Батыс» ГЖС салуды қосқанда, жалпы қуаты сағатына 1310 Гкал болатын бірқатар жобаны жүзеге асыру жоспарлануда.

Олжас Бектенов халықтың белсенді өсуі және қалалық инфрақұрылымның кеңеюі жағдайында қазіргі заманғы жылумен жабдықтау көздерінің құрылысы ерекше маңызға ие екендігін атап өтті.

Премьер-министрге елорданың LRT құрылысы бойынша негізгі көлік жобаларының бірін іске асыру барысы туралы 112-станса алаңында баяндалды. Өткен жылдың қорытындысы бойынша эстакада, аспалы көпір және барлық стансалардың темірбетон конструкцияларының құрылысы аяқталды. Жобаның қажеттіліктерін қамтамасыз ету үшін Астанада шпалдар өндірісі іске қосылды. Оларды дайындау үшін Б-55 маркалы бетон қолданылады, арматураның алдын-ала кернеу технологиясы қолданылады, бұл тасымалдау кезінде құрылымдардың жарылып кетуіне жол бермейді және аязға төзімділігін арттырады. Бүгінде 35 мыңнан астам шпал дайындалды, жобаға барлығы 87,6 мың бірлік шпал қажет.

Қазіргі уақытта нысанда рельстер төселуде – ұзындығы 2 шақырым болатын учаскеде, сондай-ақ оптикалық талшықта жұмыс аяқталды. Биыл жұмысқа 2 мыңға жуық адам жұмылдырылды, жаз мезгілінде нысанға 5 мыңға жуық маман тартылатын болады.

«CTS» ЖШС басқарма төрағасы Асылбек Дүйсебаев 25 қазанда LRT-ны тестілік режимде іске қосу, яғни жолаушысыз пойыздарды сынақтан өткізу жоспарланып отырғанын хабарлады. Астанадағы жеңіл рельсті көлік жобасы озық GoA4 стандартына сәйкес жүзеге асырылып жатыр, бұл 6 айлық сынақ мерзімін талап етеді. 

Сонымен қатар Премьер-министрге LRT бойындағы аумақты абаттандыру жобасы таныстырылды. Әуежайдан Рысқұлов көшесіне дейін ірі ағаштар мен көпжылдық бұталар отырғызылып, автоматты суару жүйесін орнату жоспарланған. Қабанбай батыр даңғылы бойымен Сығанақ көшесіне дейінгі аумақ балалар және спорт алаңдары, жаяу жүргіншілер жолдары қоғамдық кеңістіктерге бөлінген. Әрі қарай жолаушылар ағыны белсенді 2-теміржол вокзалына дейін кең автотұрақтар, велосипедке арналған жолдар жасалып, көгалдандыру қарастырылған.

Олжас Бектенов депоның басқару орталығы аумағында құрылыс-монтаж жұмыстарының барысымен танысты. Жоба қытайлық серіктес China Railway Asia-Europe Construction Investment Co., Ltd. компаниясымен бірлесіп жүзеге асырылып жатыр. Толық автоматтандырылған депо құрамдарды тұраққа қоюға және жөндеуге, материалдар мен қосалқы бөлшектерді сақтауға арналған 13 негізгі ғимараттан құралған. Сондай-ақ мұнда диспетчерлік пункт, байланыс торабы және LRT пайдаланушы компанияның әкімшілік кеңсесі бар барлық қоғамдық көлік түрлерін басқаратын орталық салынып жатыр. 

Депо алаңында LRT-ға арналған жылжымалы құрамды өндіруші CRRC Tangshan Co.,Ltd. зауытымен бейнебайланыс арқылы тікелей қосылым болды. Премьер-министрге LRT бойымен жолаушыларды тасымалдайтын локомотивтердің ерекшеліктері баяндалды. Барлығы 650 орынға есептелген 19 төрт секциялы құрам жұмыс істейтін болады. 

Tangshan CRRC Group компаниясының басқарма төрағасы Чжоу Цзюньянь қазіргі уақытта өндірісте сағатына 350 км/сағ дейін жоғары жылдамдықты пойыздар өндірісіндегі технологиялар мен стандарттарды қолдана отырып, алғашқы екі құрамды құрастыру жұмыстары жүргізіліп жатқанын атап өтті.

Жасау процесінде заманауи материалдар, мысалы, корпус бөлшектеріне арналған алюминий қорытпасы, серпімді дөңгелектер, жайлы жүру үшін көп қабатты терезелер, аса берік органосиликаттан жасалған былғары орындықтар сияқты заманауи материалдар қолданылады. 

Құрастыру тікелей құрылыс алаңында жүргізіледі. Әр құрам 36 жоғары сапалы монитормен, 11 камерамен және пойыздарды автоматты басқару жүйелерімен жабдықталады.