Мәжіліс депутаты Дәулет Мұқаев елдегі баспана мен үй алу бағдарламаларындағы былықты айтты, деп хабарлайды El.kz ақпарат агенттігі.
Менің қозғайтыным – баспана мәселесі. Бұл, білесіздер, қазақстандықтардың бас ауруына айналуда. Әсіресе соңғы жылдары мәселе күрт шиеленіскендей. Баспана жайлы мәселені Мәжіліс мінберінен бірнеше рет көтерген едік. Үкімет тарапынан мардымды жауап болмады. Маған үнемі сырғытпа жауап келеді. Бүгінгі таңда баспана нарығы тұралап тұр. Үй алудың барлық бағдарламасы тоқырауға ұшырады. Өз депутаттық сауалымда «Бақытты отбасы» және «Шаңырақ» бағдарламаларына өзгеріс енгізу, «7-20-25» бағдарламасы бойынша лимитті алып тастау, «Жас отбасы» бағдарламасы жайлы бірнеше ұсыныс айтқан едім. Бұл мәселелер әлі де өзектілігін жоғалтқан емес. «7-20-25» бағдарламасы жемқорлықтың ортасына айналуда. Бағдарлама арқылы үй алу үшін пара берушілер де көбеюде. Ал жастар мәселесінің орны бөлек, - деді депутат.
Депутат жастарға арналған мемлекеттік бағдарламаның қажеттілігі артып жатқынына тоқталды.
Елімізде баспана бағытында қандай жұмыстар атқарылуда? Президентіміз «Отбасы банктің» қызметін қайта қарауды, облыс орталықтарына емес, аудандарға, моноқалаларға және ауылдарға басымдық беру керек деген еді. Өзгеріс қашан болады? Қашан халыққа тиімді қолжетімді бағдарлама іске қосылады? Бүгін «7-20-25-ке» лимит ашылды. 5 минутта бітті де қалды. Оқырмандардан: «Бұл не деген сұмдық» деген хаттар келіп жатыр. «Менен банк менеджері 1 млн 400 мың сұрады», «Менен 700 мың теңге сұрады» деген хаттар жіберуде. Бұл қашан тоқтайды? – деп сұрады Дәулет Мұқаев өнеркәсіп және құрылыс министрінен.
Ведомство басшысы болса депутатпен бірге отырып, бағдарламаларды талқылауға дайын екендігін жеткізді.
Ең алдымен, мұндай үлкен мәселені бір сұрақпен айта алмаймын. Бірақ бірнеше фактіні сізге берейін. Мысалы, 2023 жылға мемлекет 10 мың пәтер берді. Оған 105 млрд теңге бөлінді. Келесі жылға жоспарларымыз бар. Екінші мәселе, Мемлекет басшысының тапсырмасы бойынша өткен жылы жалға алуды жеңілдету үшін субсидиялау бағдарламасы іске асырылды. Тағы басқа бағдарлама бойынша мемлекет қаражат бөліп жатыр. Өзіңіз білесіз, барлық халықты баспанамен қамту оңай емес. Егер сізде уақыт болса, сізбен бірге отырып, барлық бағдарламаны бірге қарайық, - деді Қанат Шарлапаев.