“Шетелдегі қазақ балалары” атты бірегей жобаның авторы, журналист Жанар Байсеміз Мәжіліс депутаты Нартай Аралбайұлына ренішін жеткізді, деп хабарлайды El.kz ақпарат агенттігі.
Нартай, “Шетелдегі қазақ балалары жобасынан көріп, сұхбатқа шақырдым, деп айтсаң аузың қисайып қала ма? Немесе, ШҚБ көрсетті десең де болатын еді ғой. Бір ауыз сөз ғой, айналайын-ау! Афишаға Сабинаның бағдарламадағы сұхбат берген жерін кесіп, фото қойыпсың. Басқа басқа сенен мұндайды күтпедім, - деп жазды Жанар Байсеміз.
Сондай-ақ басқа да әріптестеріне өкпесі қара қазандай екенін жасырмады.
Жалпы, мен қазіргі БАҚ, журналистерді түсінбей кеттім. Өткенде, “Хабар” арнасы “Ұйқым келмейді” бағдарламасынан бір продюсер хабарласып, 26 жылдан кейін туған анасымен табысқан Гүлмира-Сейдж қызымызды эфирге шақырып беруге өтініш жасады. “Жібек жолы” арнасын атайсыздар ма, жоқ, айтқызбайды, бағдарламаның атауын айтамыз, міндетті түрде, деді. Ок, көмектестік. Эфирге шақырып бердік. Бірақ, бағдарлама туралы бір ауыз сөз айтпаған. Продюсерім жазса, жауап бермейді, содан өзім жаздым, 1-ден уәде Құдай сөзі, 2-ден этика қайда, деп. ИГНОР!!! Мүлдем жауап берген жоқ. Алдында 126 рет жазған жігіт бір ауыз сөз жазуға жарымады. Қызық екен, и жарайды, деп қоя салдым, алысып отыруға мұршам жоқ, - деп жазды журналист.
Жанар Байсеміз өзінің бағдарламасы лайықты түрде ата алмағанына наразы.
Бұл қарапайым әдеп қой. Сөзім жоқ. Айтыңдар, таратыңдар, менің атымды атамай-ақ қойыңдар, бағдарлама туралы бір ауыз айта салсаңдар, өлесіңдер ме? Хабардың Ұйқым келмейдісіне мүлдем сөзім жоқ! Сосын, бір телеарна эфирінен екінші телеарна туралы айтса не болады? Осы ескіліктің сарқыншағын жұлып алып тастау керек. Бірін бірі көтермелесе не болады? Бұндай дүние телеарналарда баяғыдан бар еді. Бір нәрсе өзгерді, деп жүрсем, ештеңе өзгермепті. Әр журналист тек өз арнасынан шығып жатқан жоба, кино т.б. мақтауда жан салмайды екен, - деп жазды ол.