Былтыр Атырау облысында қызылша инфекциясының 2252 жағдайы тіркелген болатын. Ал 2025 жылдың алғашқы үш айында зертханалық жолмен расталған 31 жағдай анықталған, деп хабарлайды El.kz ақпарат агенттігі.
Науқастардың басым бөлігі 14 жасқа дейінгі балалар (29 жағдай), ал ересектер арасында екі жағдай тіркелген. Ауру жұқтырғандардың 80 пайызы — қызылшаға қарсы екпе алмағандар. Дегенмен жағдай өткен жылмен салыстырғанда әлдеқайда тұрақты. Бұл туралы облыстық санитарлық - эпидемиологиялық бақылау департаменті басшысының орынбасары Гүлназ Ирбатырова мәлімдеді.
Мамандардың айтуынша, көктемде жедел респираторлық вирустық инфекциялар (ЖРВИ) жиі кездеседі, оның ішінде тұмау, аденовирустық және риновирустық инфекциялар кең таралған. Алайда алдын алу шараларын дұрыс сақтап, иммунитетті нығайту арқылы бұл аурулардың қаупін азайтуға болады.
Көктемде күн жылып, адамдар жеңіл киіне бастайды, алайда ауа райының тұрақсыздығы салдарынан суық тию қаупі жоғарылайды. Сонымен қатар жәндіктер мен кеміргіштердің белсенділігі артып, кейбір инфекциялардың таралу қаупі күшейеді. Осыған байланысты біз обаға қарсы станса мамандарымен бірлесіп, дәрігерлер арасында оқу-әдістемелік шаралар өткізіп, алдын алу жұмыстарын күшейттік. Сондай-ақ әуежайлар мен теміржол бекеттеріндегі инфекцияның алдын алу мақсатында арнайы оқу-әдістемелік іс-шаралар ұйымдастырылуда,–дейді дәрігер-инфекционист Айнұр Сапарова.
Дәрігерлер маусымдық аурулардың алдын алу үшін жеке гигиена талаптарын сақтауды, дұрыс тамақтануды және иммунитетті нығайтуды ұсынады. Сондай-ақ қажетті вакцинациядан өту инфекциялық аурулардың таралу қаупін азайтуға көмектесетінін ескертеді.