Астана қаласының Қазақстан халқы ассамблеясы хатшылығы және Астана қаласы әкімдігі жанындағы «Қоғамдық келісім» КММ өкілдері Астана қаласында тұрып жатқан өзге ұлт өкілдеріне салт-дәстүрі мен тілін үйреніп, мәдениетін ары қарай дамыту мақсатында арнайы ашылған жексенбілік мектептердің жұмысымен танысып қайтты.
Армян мектебінің жексенбілік сабақтары бастауыш сыныптарда, яғни 1-4 сыныптар аралығында өткізіледі. Бөлінген екі сағат аралығында оқушылар оқу-жазуды үйреніп, ұлттың мәдениеті, салт-дәстүрімен танысады. Әр сабақтан кейін оқушылар халықтық би үйірмелеріне қатыса алады. Армян жексенбілік мектебінің директоры әрі оқытушысы Айастан Мнеянның айтуы бойынша, он жылдан артық тәжірибесі бар бұл мектептер армян диаспорасымен тікелей байланыс жасап, оқушыларының ой-өрісінің жан-жақты дамуына, тіл мен дәстүрді меңгеруіне оңтайлы жағдайлар жасалып жатқандығын тілге тиек етті.
Ал корей халқының жексенбілік мектептерінің ерекшелігі - өзге ұлт өкілдерінің оқушылары көптеп оқитындығында. Айта кетерлігі, корей жексенбілік мектебінде нақты және тарихи құндылықты сақтай отырып, тіл жоғары деңгейде оқытылады, сондықтан оқушылардың корей тілін меңгерудегі ынталары да жоғары.
