Астанада Республика күніне орай конкурдан ел чемпионаты басталды

21 Қазан 2023, 15:00 9465

Жарыс «Арғымақ» ат спорты сауықтыру кешенінде өтуде. Республика күніне орай ұйымдастырылған чемпионатқа еліміздің түкпір-түкпірінен 80-нен аса шабандоз қатысып жатыр, деп хабарлайды El.kz ақпарат агенттігі.

©El.kz/Мәди ЫСҚАҚОВ

Бүгін – аталмыш жарыстың бірінші күні. Екі күнге созылатын чемпионатқа Қазақстанның түкпір-түкпірінен келген мықты спортшылар бар. Олар екі күн бойы әр түрлі биіктіктегі 8 маршрутта өз шеберліктерін көрсететін болады. Ал жекелеген бағыттарға Қырғызстаннан келген шабандоздар қатысады. Жарыстың жалпы жүлде қоры – 26 миллион теңге.

©El.kz/Мәди ЫСҚАҚОВ

Конкур спортынан Азия және Қазақстан чемпионы Ержан Мағжаев аталған чемпионатқа қатысып жатқан шабандоздың бірі. Бірінші кезеңнің әсерімен бөлісті. Ат мінуге деген қызығушылығы бала кезінен басталған екен.

©El.kz/Мәди ЫСҚАҚОВ

Қазір конкур спортымен айналысып жүргеніме 15 жылдай болды. Алыс-жақын шетел және өзіміздің ішкі чемпионаттарға қатысып жүрмін. Бұл спортқа соңғы 3-4 жылда сұраныс өте артып келеді. Өздеріңіз білетіндей, үлкен сауықтыру кешенін салды. Әсіресе, қыздардың осы спортпен айналысуға қызығушылығы жоғары. Аталған спорттың ең ұнайтын жері – бұл олимпиадалық спорт түрі. Сол себепті олимпиадаларға қатысқымыз келеді. Енді-енді көңіл бөлініп дамып келе жатыр. Болашақта олимпиадаларға барамыз деген үміттемін. Жас шамасына қарамайтын спортқа 50-70 жасқа дейін ересектер қатыса алады, – дейді қатысушы.

©El.kz/Мәди ЫСҚАҚОВ

Сондай-ақ ол ат пен шабандоздың бір-бірімен үйлесіп, бірге кедергілерден секіруі өте маңызды екенін айтты. Ал аттардың көбісін арнайы Еуропадан сатып әкеледі.

©El.kz/Мәди ЫСҚАҚОВ

Бұл спорт Еуропада мықты дамығандықтан, Польша, Франция тағы басқа мемлекеттерден әкеледі. Қазақстанда Қостанай тұқымы осы спортқа бейімдеу келеді. Дегенмен, конкур спортына қостанайдың атын табу қиын. Болашақта осы спорт бойынша Қостанай тұқымымен секіреміз деген үміт бар, – дейді конкур спортынан Азия және Қазақстан чемпионы Ержан Мағжаев.

©El.kz/Мәди ЫСҚАҚОВ

ҚР Ұлттық спорт қауымдастығының вице-президенті Тастанбек Есентаев республика күніне арналған чемпионаттың ашылуымен құттықтап, конкурдан әлем чемпионы болған аттар барын тілге тиек етті.

Болашақта осы спорт түрінен елімізде олимпиаданың чемпиондары шығады деп сенемін. Бұл –өте күрделі спорт түрі. Себебі ең басты аттың бабын келтіру қажет. Содан кейін ғана спортшы оған тиянақты жан-жақты дайындалады. 2024 жылдан бастап Алматыдағы туризм және спорт академиясының жанындағы ұлттық спорт кафедрасында «Ат спортының жаттықтырушысы» деген мамандығы ашылатын болды. Осындай ЖОО орындарында алдағы уақытта ат спортынан әлем чемпиондары шығатынына сенімдемін, – деді Ұлттық спорт қауымдастығының вице-президенті Тастанбек Есентаев.

Астана қаласының Ұлттық және олимпиадалық ат спорт түрлері федерациясының президенті Ерлан Каналимов конкурдан өтіп жатқан республикалық чемпионат Астананың төрінде бірінші рет ұйымдастырылып жатқанын айтты.

Ат десе қазақ ішкен асын жерге қояды, демекші бұл конкур спорты елімізге кейіннен келгенімен бізге жат емес. Өйткені қазақ жерінде дүбірлеп өткен талай тұлпардың ішінен аты әлемге мәшҺүр болған «Абсент» деген ат болды. Ол кезінде олимпиаданың үш дүркін чемпионы болған және 170 см биіктікті осы конкур спортынан кедергісіз секіріп, әлемдік рекорд орнатқан аттың бірі. Сол себепті, қазақ даласына конкур спорты ешқашанда бөтен емес. Әрі оны дамыту керек. Бүгін бұл жарысқа 80-нен аса шабандоз қатысып жатыр, – деді Астана қаласының Ұлттық және олимпиадалық ат спорт түрлері федерациясының президенті Ерлан Каналимов.

Амангүл Тілейқызы