Қорғаныс вице-министрі Шайх Хасан Жазықбаев Қазақстанда әскерге қабылдау жасын өзгертуді көздейтін петицияға қатысты пікір білдірді, деп хабарлайды El.kz ақпарат агенттігі.
Мерзімді әскери қызметке келіп жатқандардың бәрін әлсіз, әлжуаз деп айтуға болмайды. Барлығына топырақ шаша алмаймыз. Қазіргі балалардың өмір салты бәрімізге белгілі. Смартфон мен гаджетке байланған. Балалардың әскерге дейінгі физикалық дайындығы мұқият қарауды талап етеді, - деді вице-министр.
Жазықбаев бүгінгі республика жағдайында мерзімді әскери қызметті тоқтатуға болмайтынын атап өтті.
Неге десек, біріншіден, Қарулы күштер мерзімді әскери қызмет арқылы Қазақстан Республикасының ер азаматтарын базалық дайындықтан өткізіп, қайтадан запасқа шығарып отырады. Егер Қазақстан Республикасы халқының басым бөлігі қолына қару ұстай алмайтын болса, онда ел басына күн туғанда, кім келеді? Оларды тез арада кім дайындайды? Екіншіден, келісімшартқа көшу туралы айтып отырсыз. Бұл, әлбетте, жақсы, бірақ еліміздің экономикасына ауыр тиюі ықтимал, - деді вице-министр.