Ақтөбе облысында оқу-ағарту министрлігінің қолдауымен биыл су тасқынынан зардап шеккен Ойыл ауданының 5-11 сыныптарында оқитын 161, Ырғыз ауданының да 5-11 сыныптарында оқитын 1135 оқушысы аралық емтиханнан және қорытынды аттестаттаудан босатылады, деп хабарлайды El.kz ақпарат агенттігі өңір әкімдігіне сілтеме жасап.
Бұл туралы облыстық білім басқармасының басшысы Жайық Сұлтан мәлімдеді. Оның айтуынша, облыстағы мектептерде биылғы оқу жылы 25 мамырда аяқталады. 24 мамырда барлық мектепте 1-10-сынып оқушыларына «Білімім — Отаныма» тақырыбында бірыңғай сынып сағаттары өтеді. Ал 25 мамырда мектеп түлектерінің қатысуымен «Мектебім, саған мың алғыс!» атты салтанатты іс-шара ұйымдастырылады.
Биыл облыс бойынша 11-сыныпты 9236 түлек бітіреді. Аттестатты салтанатты түрде табыстау 12-15 маусым аралығында өтеді. Су тасқыны жағдайына байланысты екі ауданның түлектері қорытынды аттестаттаудан босатылады. Сондай-ақ биыл облыс бойынша 156 743 балаға жазғы демалыс ұйымдастыру жоспарланып отыр. Жазғы маусымда 8 сауықтыру орталығы, 673 мектеп жанындағы лагерь жұмыс істейді. Қазіргі таңда қала сыртындағы лагерьлерде ағымдағы жөндеу жұмыстары жүргізіліп жатыр, - деді Ж.Сұлтан.
Мемлекет басшысының тапсырмасына сәйкес, 2024-2027 жылдары республика бойынша балаларға арналған 50 сауықтыру орталығын ашу жоспарлануда. Бұл орайда өңірімізде 3 лагерь ашу міндеті қойылған. Биыл Қобда ауданы Егіндібұлақ ауылында «Әлия» маусымдық лагері ашылып отыр. Алдағы уақытта тағы екі лагерь құрылысын жүргізуге жер телімдері бөлінбек.
Биыл су тасқыны болған аудандарда тұратын оқушыларға жан-жақты қолдау көрсету, олардың жазғы демалысын жоғары деңгейде ұйымдастыру басты назарда болуы керек. Сондай-ақ мүмкіндігі шектеулі балалардың демалуына жағдай жасап, олардың қауіпсіздігін бақылауға алуымыз қажет. Бұл орайда жауапкершілік сіздерге жүктеледі. Сондықтан бұл бағыттағы жұмыстарды ұйымдастыруда олқылықтар болмауы тиіс, - деді облыс әкімі білім басқармасы басшысына.
Айта кету керек, аталған жиында сондай-ақ облыстық тілдерді дамыту басқармасының басшысы Амангелді Қонақбаев биылғы жылдың І тоқсанында атқарылған жұмыстары туралы баяндама жасады.