Алматыда полиция департаментінің мамандары Қазақстанда заңсыз жұмыс істеген 54 шетелдікті ұстады, деп хабарлайды Еl.kz ақпарат агенттігі
Полицейлер заңсыз жүрген шетелдіктерді қаладағы хостелдерден тапқан.
ҚР көші-қон заңнамасын сақтау бойынша рейдтер құқық бұзушылықтың алдын алуға және заңсыз көші-қон арналарын анықтауға бағытталған. Бір аптада басқа елдердің 50 азаматы және көршілес елдердің 165 азаматы әкімшілік жауапқа тартылды. 104 шетел азаматы құжаттарының болмауына байланысты қабылдап-тарату орындарына орналастырылды. Тағы 22 шетел азаматы Қазақстан Республикасынан шығарылды. Сонымен қатар 54 жеке және заңды тұлға, оның ішінде Нигерияның 12 азаматын, Бразилияның 2 азаматын заңсыз жұмысқа тартқан фирма басшылығы әкімшілік жауапқа тартылды, - деді Алматы қаласы ПД көші-қон қызметі басқармасының бастығы Асхат Бутунчинов.
Департаменттің мәліметінше, рейдтік іс-шаралардың мақсаты – қоғамдық тәртіпті сақтау, Қазақстан Республикасында болу ережелерін бұзу деректерін және шетелдіктерді заңсыз жұмысқа орналастыру деректерін анықтау, сондай-ақ шетел азаматтары тарапынан қылмыстар мен құқық бұзушылықтардың алдын алу болып отыр.