Галле (Германия) ATP 500 турнирінің чемпионы атанған Қазақстанның бірінші ракеткасы Александр Бублик әлемдік рейтингте рекордтық көрсеткішке қол жеткізді, деп хабарлайды El.kz ақпараттық агенттігі.
А. Бублик қазіргі кезде ATP Live рейтингісінде 1 344 ұпаймен 48-ден бірден 27-орынға көтеріліп тұр.
Осылайша, алдағы дүйсенбіде жаңартылатын ATP рейтингісінде Александр Бублик ресми түрде әлемнің 27-ракеткасы атанады. Бұл қазақстандық теннисші үшін рекордтық нәтиже болмақ. Ол өткен жыл басында әлемдік рейтингте 30-орынға дейін жоғарылаған еді.
Сонымен қатар, А. Бублик Галледегі жеңісі арқасында 500 рейтингтік ұпайға ие болумен қатар 410 515 еуро табыс тапты. Бұл да оның ең қомақты табысы болып есептеледі.