3 Шілде 2015, 09:00
Жолдан жоғары шығарып жазатындар – өте оптимист жандар. Олар достыққа берік, үнемі жаңа идеялардың бастаушысы болып жүреді. Ешқашан көңілсіз болмайды. Әйтеуір, түрлі әзіл айтып, жаңа бір қызық тауып, жұртты күлдіріп жүреді.
Жолдан төмен түсіріп жазатындар – өте пессимист, өмірге сенімі жоғалған жан немесе сол сәтте көңіл күйі нашар болғаны.
Еш қисайтпай түзу жазатындар – бірбеткей, айтқанынан қайтпайтын адамдар.
Оң жаққа қисайтып жазатындар – табандылықты, мақсатқа жетуді ойлайтын бірізділікті білдіреді.
Сол жаққа қарай қисайтып жазатындар – өте тынымсыз, еңбекқор жандар. Олардың көңіл күйлері тұрақсыз. Сәт сайын мың құбылып тұрады. Сондықтан мұндай адамдармен аралассаңыз, міндетті түрде шыдамды болуыңыз шарт.
Әріптерді бояп, бірнеше рет бастырып жазатындар – көбіне өкпешіл, ренжігіш болып келеді. Оларда кекшілдік те бар, әсіресе, ұсақ жазу иелерінің кекшілдігін ештеңемен салыстыру мүмкін емес.
Әріптерді ұсақ әрі әдемі жазатындар – өте ұқыпты, ұяң, ешкімге сырын аша бермейтін тұйық жандар. Олар айтқанын орындайтын бірсөзділігімен көпшіліктің құрметтісі.
Ірі әріптермен үлкен-үлкен етіп жазатындар өте жомарт болып келеді. Олардың қайырымдылығында шек жоқ. Бұлай көбінесе нашар оқитындар жазады. Алайда үлгерімі төмен жандардың көпшілігі қолғабыс етуге әзір тұратын, жұртқа жақсылық жасауға бейім адамдар болып келеді.
Түсініксіз, адам танығысыз етіп қыңыр-қисық етіп жазатындар өте көңілді жандар болғанмен, өзінше шешім қабылдай алмайды.
Кәмшат Әбдіқадырқызы
«Ана тілі»