Абай облысында «Қарасора – 2023» ЖПІШ барысында есірткі қойып кетуші топ қолға түсті, деп хабарлайды El.kz ақпарат агенттігі.
Абай облысы ПД есірткі қылмысына қарсы іс-қимыл басқармасы мен Семей қаласы ПБ есірткі қылмысына қарсы іс-қимыл бөлімінің қызметкерлері «Қарасора – 2023» ЖПІШ өткізу барысында синтетикалық есірткілерді жеткізу арнасының жолын кесті. Есірткі қылмысына қарсы күрес бөлінісінің қызметкерлері интернет дүкеннің қатысушыларын анықтады.
Оқи отырыңыз:
18, 25 және 29 жастағы үш жергілікті тұрғын облыс орталығында синтетикалық есірткі құралдарын құпия орындарға жасырын қойып кетіп отырған. Ұсталғандардан сатуға арналған 250-ден астам бір реттік синтетикалық есірткі дозасы, сондай-ақ мобильді құрылғылар тәркіленді. Олардың көмегімен жасырын орындарды суретке түсіріп, есеп беріп отырған.
Мобильді құрылғыларды тексеру кезінде Telegram мессенджерінде «курьерлер» тауар бойынша нұсқаулар мен координаттар жазылған хат алмасу чаты табылды. Тауар металл бетіне бекітілуі үшін ішіне магнит салып, жабысқақ изолентамен ораған.
Сараптама көрсеткендей, зерттеуге ұсынылған заттар жалпы салмағы 73 грамнан асатын A-PvP психотроптық заты екені анықталды. Қара нарықтағы бағасы 2 млн теңгеден асады, – деді облыстық ПД бастығының орынбасары Нариман Күлдіков.
Жыл басынан бері облыс полицейлері заңсыз айналымнан 200 келіге жуық түрлі есірткі заттарын тәркіледі.
Күдіктілер уақытша ұстау изоляторына қамалды. Осы дерек бойынша ҚР ҚК-нің 297-бабы 3-бөлігімен сотқа дейінгі тергеу жүргізіліп жатыр. Оның санкциясы 15 жылға дейінгі мерзімге бас бостандығынан айыру жазасын қарастырады.