Павлодарлық Гүлсезім Қайнарова «Инстаграмда» аспаздыққа арналған парақша (yasmin.jangir) жүргізеді. Бүгінде оның 37 мыңнан астам оқырманы бар. Гүлсезім ас мәзірлерін қазақ және орыс тілдерінде өте сауатты әрі түсінікті жазады. Сондықтан болар, қазақстандық қыз-келіншектер арасында оның парақшасы ерекше танымал.
– Гүлсезім, «инстаграмдағы» белсенділігіңіз қашан басталды? Неліктен аспаздық тақырыбында пост жазуға бел будыңыз?
– Мерекелердің бірінде жолдасым мульти ас әзірлегіш сыйлап, сонымен пісірген бисквиттің суретін «инстаграмға» салдым. Содан кейін анда-санда сәтті піскен тағамдардың суреттерін салып тұру әдетке айналды. Бір күні айтыскер Айнұр Тұрсынбаева екі-үш суретіме лүпіл (лайк) басып, маған жазылғанын көрдім. Сонда скриншот жасап, бір қуанғаным бар. Ол кездегі суреттерім онша емес еді, қазіргі суреттеріме де көңілім тола бермейді.
Содан Айнұр ханым өз парақшасына мен жайлы пост жазып, оқырмандарымның саны бір күнде 300-ден 6 мыңға жетті. Бір-екі айдан кейін Айнұр ханым маған тағы бір постын арнады. Соның арқасында оқырмандарымның саны 20 мыңға жетті. Өкінішке қарай, ол кісімен өмірде таныс емеспін. Бірақ, оған айтар алғысым шексіз. Мен үшін бұл күтпеген жағдай болды. Сол уақыттан бері дайындаған тағамды суретке түсіріп, екі тілде мәзірін жаза бастадым. Оқырмандарымның саны артқан сайын адамдардың алдындағы жауапкершілігімнің артқанын сезінемін.
– Өзіңіз туралы, отбасыңыз туралы айтып беріңізші.
– Жалпы, Шығыс Қазақстан облысының тумасымын. Павлодар өңіріне тұрмысқа шықтым. Студенттік шағым Астана қаласында өтті. Л.Н.Гумилев атындағы Еуразия ұлттық университетінің Халықаралық қатынастар факультетінің түлегімін. Тұрмыс құрғаныма 8 жыл болды, үш баламыз бар. Тұңғышымыз Ясмин жақында 5 жасқа толады. Екінші баламыздың есімі – Жәңгір, жасы – 2,8. Жақында үшінші рет ана атандым. 4 айлық Әлиахмет есімді ұлымыз бар. Негізі, аудармашы болып жұмыс істеймін, қазіргі уақытта декреттік демалыстамын.
– Қазір қанша оқырманыңыз бар? Олардың барлығы нәзік жандылар ма?
– Қазір 37 мың оқырманым бар. Оқырман саны мен үшін мақсат емес, мәселе – сапада. Үнемі пікір қалдырып, байланысып тұратын оқырмандарым аз. Олардың басым көпшілігі – өзім сияқты аналар. Бірақ, соңғы уақытта тұрмысқа шығуға дайындалып жүрген бойжеткендер жиі жазатын болды. Бұл, әрине, қуантпай қоймайды.
– «Инстаграмға» салу үшін күн сайын ас әзірлейсіз бе? Болашақта осы хоббиіңізді бизнеске айналдыру ойда бар ма?
– Шынымды айтсам, әдейілеп «инстаграм» үшін ас әзірлемеймін. Күнделікті пісіретін, салуға тұрарлық болып көрінген, суретке түсіріп үлгерген нәрсені ғана саламын. Арнайы техникалық құралдар болмағандықтан, суретке күндіз ғана түсіремін. Сол себепті кешкі уақытта әзірленген ас «инстаграмнан» құр қалады (күлді).
Әзірге хоббиді бизнеске айналдыру жөнінде нақты мақсатым жоқ. Бәлкім, болашақта қолға алатын шығармын.
– Оқырмандарыңыз сізге қандай пікір, лебіздер жазады?
– Оқырмандарым көбінесе тек алғыс, жылы лебіздерін білдіріп жатады. Мүмкіндігімше, олардың сұрақтарына жауап беріп отыруға тырысамын. Жағымсыз пікір қалдырған жағдайлар қазірге дейін 2-3-ақ рет кездесті.
– «Инстаграм» арқылы пайда тауып көрдіңіз бе? (Жарнама арқылы, мүмкін, біреулер тапсырыс берген болар?)
– Жоқ. Ұсыныстар болды, бірақ, өзім пайдаланып көрмеген, сапасы күмәнді нәрсе үшін адамдарды алдағым келмейді. Алдағы уақытта жақсы ұсыныстар болса, бас тартпаймын деп ойлаймын. Одан табыс түсіп жатса, парақшам үшін түрлі әдемі ыдыс-аяқ, фотосуретке қажетті заттар алар едім (күлді).
– Қандай елдердің асханасының тағамын жиі әзірлейсіз?
– «Инстаграмнан» тыс, жалпы, италиялық асхананы ұнатамыз. Жолдасым мен балаларым паста, пицца сияқты тағам түрлерін қатты ұнатады.
– Қандай тағам әзірлегенді ерекше ұнатасыз?
– Қамыр илегенді, қамырмен жұмыс жасағанды қатты ұнатамын. Ет қосылған бәліштің түр-түрін пісіріп, бетін әдемілеп безендіргенді жақсы көремін. Қамырмен жұмыс жасағаннан нағыз ләззат аламын деуге болады (күлді).
– Өзіңізден басқа аспаздық туралы парақша жүргізетіндерді оқисыз ба?
– Шыны керек, қазіргі кезде әрбір екінші парақша ас әзірлеуге арналған. Өзім көбіне ресейлік фуд-блогерлерді оқимын.
– Ас мәзірін екі тілде де сауатты жазады екенсіз. Рецептерді көбіне қайдан аласыз? Ойдан шығаратын кездеріңіз бола ма?
– Рахмет! Соңғы кездері тек орысша жазып жүрмін. Сәбилі болғандықтан, аударып жазуға үнемі қолым тие бермейді. Бұған кейбір оқырмандар наразы болса, енді бірі түсіністік танытып жатыр. Біреулер «взбивать етеміз, сковородкаға қуырамыз, начинкасын саламыз» деп жазыңызшы, сонда түсінікті болады» деген пікірлер де қалдырып жатады. Бірақ, бұл сөздердің қазақ тілінде аудармасы бола тұра, бұлай жазу тілімізді қорлау деп білемін. Сондықтан, орысша жеке, қазақша жеке жазамын.
Рецептерді көбіне фуд-журналдардан аламын. «Issuu» деген қосымша арқылы түрлі танымал журналдарды жүктеп оқимын. Оған қоса, анамнан қалған рецептер жинағы бар. Ойдан шығаратыным – көбінесе, тәтті пісірмелер. Балаларыммен түрлі өнімдерді алып-қосып, пісіріп байқап көреміз.
– «Инстаграмдағы» танымалдылық сізге не берді?
– Танымалдылық деген сөзді маған қатысты айту артықтау шығар. Өзімді танымал деп есептемеймін. Жалпы, парақшам маған көптеген онлайн-достар, үлгі аларлық жақсы адамдармен танысу мүмкіндігін берді. Оқырмандарым «сіздің парақшаңызға қарап әзірледім, күйеуімді қуанттым, енемнен мақтау сөз естідім, қонақтарым мәз болып қайтты, сіздің парақшаңыздан көп нәрсе үйрендім» деп жылы лебіздерін білдіріп жатқанда қатты қуанамын, содан шабыт аламын. Оқырмандарыма көп рахмет!
– Есіңізде қалған қызықты пікір немесе оқиғаны айтып беріңізші.
– Direct-ке үнемі бір бойжеткен аспаздыққа қатысты сұрақтарын қойып, жазып тұратын. Тұрмысқа шығуға дайындалып жүр екен. Жақында ұзатылып, отбасылы болды. Жолдасына менің парақшамнан қарап ас әзірлейді екен. Содан бір күні: «күйеуім күнде жұмыста отырып, кешкі асқа мынадай ас әзірлеші деп атауын жібереді. Есім шығып, сіздің парақшаңыздан іздеймін, рецептін тауып алып пісіремін. Сонда күйеуім жазған ас түрлерінің бәрі сіздің парақшаңыздан табылады. Сөйтсем, күйеуім де сіздің парақшаңызды оқиды екен. Тағамдарыңыздың суреттеріне қарап, қызығып, күнде кешкі асқа тағам түрін таңдап, маған айтады екен. Мен болсам, рецепті сіздің парақшаңыздан ала қоямын. Екеуміз бірдей сіздің парақшаңызды оқитынымызды кейіннен білдік» деген қызықты пікірі есімде қалды.
– Қандай жоспарларыңыз бар?
– «Инстаграмға» қатысты айтар болсақ, суреттерімнің барлығын ұялы телефоныма түсіремін. Бірақ, кәсіби фотоаппарат алып, суреттерімді жаңа деңгейге көтергім келеді. Жай ғана ермек болғандықтан, күйеуімнің еңбегін оңды-солды шашқаным орынсыз болар. Анда-санда отандық телеарналардың біріне бағдарлама аударып тұрамын. Содан тапқан табысымды жинақтап, құрылғылар алуды, «Youtube» желісінен өз арнамды ашып, «дилетант» емес, нағыз фуд-блогер болсам деген ой-арманым бар.
– Әңгімеңізге рахмет! Сәттілік тілейміз!