5 наурыздан бастап "Наурыз" тұрғын үй бағдарламасына құжат қабылдау басталады. Биыл бағдарлама шарттары өзгерді. Мемлекет бұл мақсатқа 300 млрд теңге бөліп, шамамен 11,5 мың азаматтың баспана алуына мүмкіндік жасап отыр,деп хабарлайды El.kz ақпарат агенттігі.
Төменде бағдарламаның негізгі шарттары мен қатысу жолдарын қарастырамыз.
Ипотекалық шарттар
- Пайыздық мөлшерлеме: Әкімдік кезегінде тұрған әлеуметтік осал топтар үшін – 7% (ЖТСМ 7,1%-9,6%), тұрғын үйге мұқтаж азаматтар, қандастар мен өзге де санаттар үшін – 9%. Жинақ сомасы 50%-ға жеткен кезде мөлшерлеме 3,5%-дан 5%-ға дейін төмендейді.
- Несие мөлшері: Астана мен Алматы үшін – 36 млн теңге, басқа аймақтар үшін – 30 млн теңгеге дейін (жөндеу шығындарын қоса алғанда).
- Бастапқы жарна: Жаңа әрленген тұрғын үй үшін – 10%, әрленбеген жаңа немесе қайталама тұрғын үй үшін – 20%-дан басталады (кемінде 2 млн теңге болуы шарт).
- Өтеу мерзімі: 19 жылға дейін.
Қатысу шарттары
- Меншігінде тұрғын үйі болмауы: Соңғы 5 жыл ішінде қатысушы мен оның отбасы мүшелерінің атында жылжымайтын мүлік болмауы қажет.
- Жас шектеуі: 18-ден 63 жасқа дейін.
- Табыс көзі: Соңғы 6 ай ішінде ресми табыс болуы керек (жалақы, кәсіпкерлік кірісі, жәрдемақылар, стипендия және тұрғын үй төлемдері есептеледі). Қажет болған жағдайда, екі кепілгерді тартуға болады.
- Бағдарламаға қатысу шектеуі: Бір салымшы немесе отбасы бағдарлама аясында тек бір рет тұрғын үй ала алады.
Қандай тұрғын үй сатып алуға болады?
- Баспана Маркет порталынан жаңа немесе пайдалануға берілген тұрғын үй таңдап, брондауға және сатып алуға болады.
- Астана, Алматы, облыс орталықтарындағы жаңа немесе салынып жатқан тұрғын үйлерден пәтер.
- Моноқалалар, ірі ауылдық елді мекендер мен аудан орталықтарында екінші нарықтан тұрғын үй алу (жылдық қаражат көлемінің 30%-нан аспау керек).
- Жөндеу жұмыстарына несие алуға болады (тұрғын үй несиесінің 20%-нан аспауы тиіс).
Депозит талаптары
- Бағдарламаға қатысу үшін Отбасы банкінен депозит ашу қажет.
- Депозиттегі жинақтың ең аз сомасы – 2 млн теңге.
- "Табысты", "Жинақ" және "Арнау" тарифтік бағдарламалары аясында ашылған депозиттер жарамсыз.
- "Кейіннен сатып алу мүмкіндігімен жалға алу" және "Отау" бағдарламаларына қатысқан салымшылар өтінім бере алмайды.
Қатысушыларды іріктеу
Бағдарлама қатысушылары балдық жүйе бойынша іріктеледі:
- Әлеуметтік осал топтағы азаматтарға – 10 балл.
- 18 жасқа дейінгі балалары барларға – 10 балл.
- Некеде тұрғандарға – 5 балл.
- 35 жасқа дейінгілерге – 5 балл.
- Әр 1 000 теңге жинақ үшін – 1 балл.
Өтінім беру процесі
Өтінімдер 5-31 наурыз аралығында онлайн қабылданады (жұмыс күндері 9:00-21:00):
- Baspana Market сайтына тіркелу.
- "Менің өтінімдерім" бөлімінде "Наурыз" бағдарламасын таңдау.
- Қажетті аймақтарды таңдап, шарттармен келісу.
- Депозитті көрсету және растау.
- SMS арқылы растау кодын енгізу.
- Мемлекеттік деректер базасы арқылы тексерістен өту (3 жұмыс күні ішінде).
- Құжаттарды электрондық цифрлық қолтаңба (ЭЦҚ) арқылы бекіту.
Бағдарлама арқылы баспана алу мүмкіндігін жіберіп алмаңыз!