Алматы облысы – еліміз үшін айрықша орны бар аймақ
Бұл туралы Қасым-Жомарт Тоқаев Алматы облысы жұртшылығымен кездесуінде айтты
Мемлекет басшысы Қасым-Жомарт Тоқаевтың Алматы облысы жұртшылығымен кездесуі басталды, деп хабарлайды El.kz. Бұл туралы Ақорда мәлімдеді.
«Көрікті мекеннен есімі ел тарихына алтын әріппен жазылған көптеген тұлғаларымыз шыққан. Бұл – ақ білектің күшімен, ақ найзаның ұшымен ел қорғаған Наурызбай, Райымбек батырлардың дүниеге келген жері. Бұл –Сүйінбай мен Жамбылдай ақындардың елі. Нұрғиса Тілендиев, Мұқағали Мақатаев, Тұманбай Молдағалиев және Бердібек Соқпақбаев бастаған төл мәдениетіміздің біртуар тұлғалары да – осы өңірдің перзенттері. Бір сөзбен айтсақ, Алматы облысы – еліміз үшін айрықша орны бар аймақ», - деді Мемлекет басшысы кездесуде.
Оның айтуынша, биыл Президент шешіміммен елімізде бірнеше облыс қайта құрылған.
«Жетісу жерінде дербес екі аймақ пайда болды. Алматы облысының әкімшілік орталығы Қапшағайдың жағасына көшірілді. Жұрттың өтінішіне сай қалаға Дінмұхамед Қонаевтың есімі берілді. Мұны, шын мәнінде, тарихи әділдіктің орнауы және халықтың ортақ қалауы деуге болады. Облыс орталығы мәртебесіне ие болған Қонаев қаласы енді тың қарқынмен дамитын болады. Бұрынғы Алматы облысын екіге бөлу – аймақтағы ахуалды терең зерделеп, мұқият ойластыра отырып қабылданған шешім», - деп атап өтті Президент.
Қысқа да нұсқа. Жазылыңыз telegram - ға