Академик Асқар Жұмаділдаевқа жерлестері көлік мінгізді
Қызылордада академик Асқар Жұмаділдаевқа жерлестері атынан су жаңа автокөлік кілті табысталды, деп хабарлайды El.kz ақпарат агенттігі.
Өткен жыл қорытындысына арналған салтанатты жиында облыс әкімі Нұрлыбек Нәлібаев Асқар Жұмаділдаевқа сыр жұртшылығы атынан автокөлік мінгізді.
Академик жерлестері көрсеткен құрметке ризашылығын білдіріп, жиналған қауымды жаңа жылмен құттықтады.
Айта кетсек, Мемлекет басшысының Жарлығымен Республика күні қарсаңында отандық ғылымды дамытудағы айрықша жетістіктері, сондай-ақ қоғамдық қызметтегі аса үздік еңбегі үшін «Қазақстанның Еңбек Ері» атағы Президент жанындағы Қазақстан Республикасы Ұлттық ғылым академиясының вице-президенті Асқар Жұмаділдаевқа берілген болатын. Президент Қасым-Жомарт Кемелұлы ұлт мақтанышына айналған тұлғаның ерен еңбегін жоғары бағалады. Сыр топырағынан түлеген академик, математик, ғалымның осындай жоғары марапатқа ие болуы жерлестерін де қуанышқа бөледі.
Қысқа да нұсқа. Жазылыңыз telegram - ға